رواية زوجي المصون كاملة

1 بقلم ريم السيد

اقلعت منذ قليل الطائرة التي تنقل بين ركابها زوجي المصون الذي اراه شهرا واحدا من كل عام ..! شهرا بدايته سعادة عارمة لقدومه ثم نبدأ في عد الايام المتبقية وهي تمر سريعا دون ان نشعر ثم بكاء وحزن لرحيله لازالت اسراء وخديجة وسعد يبكون رحيله لم استطع ايقافهم فها انا لم استطع التوقف بعد …فكرة ان تعيش الزوجة دون رجلها الذي هو سند وامان وحماية لها من اذى النفس والروح هي فكرة قاسية جدا ..فكرة ان تكون الزوجة هي الأم والأب والتي تحمل على عاتقها كل المسؤوليات فكرة قاسية أيضا …. لكن ها هي الايام تمر واصبحت معتادة كل الاعتياد بشأن ذلك ..كما ان صديقتي ياسمين التي تسكن في الدور الثاني من العمارة التي نسكن بها تقضي معي اغلب الوقت فتهون علي بعض الشيء … حين وصلنا الى العمارة كان الطابق الاول به بعض الضجة تقريبا بنات الاستاذ احمد المحامي مجتمعات هن واطفالهن اللـ،ـيلة هنا دائما ماتشكو لي الدكتورة سامية قلة مجيئهم فحتى ابنها الاصغر يعمل كظابط حربية ويخدم في محافظة اخرى لابد انها الان سعيدة جدا بزيارة بناتها … دخلت الى شـ،ـقتي في الطابق الثالث ..ها انا ادخل بمفردي من جديد لنقضي سنة اخرى دون زوجي اعاده الله لنا بكل خير ..
-يلا يااسراء خدي أخواتك واتفرجو على التليفزيون على اما اتبل الفراخ عشان بكرة نعمل بانيه
=حاضر ..
-مالك
=مافيش
-زعلانة عشان بابا سافر
=اكيد بس انا مش بحب البانيه
-هههههه ضحكتيني يااسراء خلاص ياستي بلاها بانيه
هعمل فشار ونشوف فيلم حلو
=ايوى كدة هروح ادور على فيلم على ماتيجي
احاول دائما إرضاءهم قدر المستطاع مع بعض الشدة احيانا حتى أتمكن من تربيتهم بشكل سليم ..قضينا الوقت بشكل لطيف الى ان دق الباب ..
=سلام عليكم
-عليكم السلام اتفضلي يا ياسمين
=يزيد فضلك ياحبيبتي انا عملت كيكة قولت اجيب للعيال عارفة بيحبوها
-ربنا يخليكي يارب طيب تعالي اقعدي معانا شوية
=الصبح هجيلك بقى لما سليم يروح الشغل
ذهبت ياسمين وعدت لأطفالي وبعد ساعة طلبت منهم ان يخلدوا للنـ،ـوم حتى لا يتأخروا في الصباح عن المدرسة وقمت انا بغسيل الأطباق والأكواب ثم أمسكت بهاتفي لأطمئن على زوجي بالتأكيد قد وصل ..أرسلت له رسالة عبر الواتساب
-ازيك ياحبيبي حمد الله ع السلامة
=الله يسلمك معلش انشغلت وانا بحط الحاجة ونسيت أكلمكم
-ولا يهمك ..انت هتروح الشغل بكرة ولا
=اه هروح ممكن اخد نص يوم وأروح
-تمام اسيبك تنام بقى زمانك تعبان
=العيال نامو ولا لسة
-اه اكيد وانا هنام اهو عشان اعرف اصحيهم بدري
=يلا تصبحي على خير ياحبيبتي
اغلقت مع زوجي ورحت في نـ،ـوم عميق ..
في اليوم التالي كان اليوم كأي يوم استيقظ ابنائي وذهبت اسراء (ثانية ابتدائي) وخديجة (رياض الأطفال ) وسعد في روضة للصغار حتى يندمج ويلعب مع الأطفال ويتعلم بعض الآداب … وبدأت انا بأشغال المنزل ..ثم أتت ياسمين …
=عاملة ايه يا ثريا
-تمام والله انتي اخبارك ايه
=العادي مافيش جديد
-مالك
=تمام …
-سليم كويس !
=بلاش السيرة دي
-يابنتي اهدو على بعض شوية
=انا زهقت على فكرة وهو زهقان اكتر مني …احنا بقالنا ست سنين متجوزين ولسة هو مصمم انه مايخلفش وانا همـ،ـوت على طفل يسليني
-مافيش حد من أهله بيقنعه خالص
=ماحدش قادر يقنعه هو مش عايز وكل اما أكلمه يقولي اننا متفقين من الاول بس انا كنت مفكرة سنة ولا اتنين على مانفهم بعض وبعدين نخلف
-طيب ايه السبب يعني انتو ماديا مرتاحين جدا ايه الآي يمنع
=هو مش عايز يبقى مسؤول عايز يعيش يستمتع بحياته من غير مايكون مسؤول عن حد
-غريب اوي بصراحة ربنا يهديه بصي والله ادعيله مع الوقت هيكون هو اللي عايز
=يارب ياثريا … ماتيجي نروح النادي بالليل نتهوى والعيال تلعب شوية
-خلاص هشوف احمد وأكد عليكي
=قشطة
-…ايه ده ايه صوت الصويت ده !؟
=مش عارفة تعالي نشوف فيه ايه
خرجنا من الشـ،ـقة مسرعين لنكتشف ان الأستاذ احمد المحامي قد وافـ،ـته المـ،ـنية … لم يصبه اَي مرض ولم تطهر عليه أعراض إعياء قد توفـ،ـي فجأة دون سابق إنذار كانت بناته تنتحب بشدة وزوجته هادئة جدا لا تبكي ولا تتكلم وكأنما اصابها الذهول حين ذهبت لإيقاظه فلم يرد عليها لتكتشف انه فارق الحياة … قمنا بواجب العزاء ومساعدة أهل الدار واعددنا بعض الطعام لأهل الميت وحين عودة ابنائي اخذتهم ياسمين وصعدت الى ان انتهي من رفع الطعام ..ثم تبعتها الى اعلى …
=حاجة تقطع القلب والله وسبحان الله بناته كانو هنا من امبارح كأنه كان بيودعهم
-اه والله كان بقالهم ييجي تلت شهور مجوش… بس الدكتورة سامية صعبانة عليا اوي دي لا راضية تأكل ولا تشرب ولا تكلم حد الله يكون في عونها
=اكيد يابنتي هو اللي معاها وواخد بحسها ربنا يصبرها
-بيقولو خالد ابنه جاي في السكة لسة بس ياعيني شكله مش هيلحق الدفـ،ـنة
=ربنا يصبرهم يارب ..بصي انا هنزل دلوقتي زمان سليم جاي دلوقتي هحضرله يأكل ولما يروح العزا هبقى اطلعلك عشان مش هينفع نادي النهاردة
-طيب …
اكلت كلا من خديجة واسراء لكن لم يأكل سعد وبدا حزينا …
-مالك ياحبيبي
=….
-سعد انت زعلان من ايه
=….
-مش هتحكي لماما حبيبتك
=هو انا تخين ليه ياماما
-مين قالك كدة انت مافيش اجمل منك
=الميس النهاردة وزعت علينا كلنا شوكلاتة وقالتلي بلاش انت عشان ماتتخنش اكتر وكلهم ضحكو عليا (بدأ في البكاء)
-لا ياحبيبي اكيد هي مش تقصد انت شكلك حلو وانا هقول لبابا يجبلك الشوكلاتة اللي بتحبها من عنده وانا كمان هجبلك شوكلاتة حلوة ماتزعلش ابدا
=….هما ليه دايما بيتريقو عليا انا مش هاكل تاني عشان ماتخنش
-لا ياحبيبي لازم تاكل عشان تكبر وتبقى الراجل بتاعنا وتحمينا
=بجد يا ماما انتي شايفاني حلو
-انا شايفاك اجمل واحد في الدنيا …يلا عشان ناكل سوا وناخد الدوا (دواء الغدة فهو مريض غدة وهو مايجعل وزنه زائدا قليلا)
=حاضر ياماما ..
كنت مستاءة جدا من تلك المعلمة التي عرضت طفلي للتنمر بهذا الشكل المهين لنفسيته وقررت في اليوم التالي ان اذهب اليها واوبخها على فعلتها تلك فيكفي مرض ابنه وانه محروم من بعض الالعاب بسبب مرضه فلن تأتي هي الاخري لتؤذي نفسيته … حينها دق هاتفي وكان زوجي …
-الو يااحمد عامل ايه
=الحمد لله ايه فينك بتصل من زمان قلقت
-لا مافيش حاجة اخنا كويسين …كنت تحت عشان استاذ احمد اتوفى
=لا حول ولا قوة الا بالله فجأة كدة
-اه ياعيني
=لازم اكلمهم اعزيهم … العيال كويسين
-اه الحمد لله
=طيب خلي بالك من نفسك ومن العيال
-ماشي ياحبيبي يلا في رعاية الله
=مع السلامة
دق الباب وكانت معلمة الموسيقى قد وصلت ..
-ميس اسماء اتفضلي
=ربنا يخليكي يامدام ثريا
-والله انا بعتذر لحضرتك انا كنت لسة هكلمك
=على ايه بس !؟ هو فيه مشكلة
-النهاردة فيه حالة وفاة في العمارة ومش هينفع درس البيانو النهاردة انا بعتذر جدا
=لا لا مافيش مشكلة ولا يهمك البقاء لله (همت بالذهاب)
-والله مانتي ماشية دلوقتي اقعدي معانا شوية مش معقول تيجي وتمشي كدة بسرعة
حينها اتت ياسمين ايضا وجلست مع اسماء وذهبت انا لإعداد الشاي بينما التف الاطفال بأسماء من تعلقهم بها بدأوا في الحديث قليلا يحكون معها عن المذاكرة ومايحدث مع رفاقهم فأسماء تتعامل معهم كما لو انها من سنهم بعدما جئت انا طلبت منهم ان يلعبوا سوية الى ان ننتهي من الشاي ..
-عاملة ايه يااسماء
=تمام والله
=•انتي عندك اطفال ياميس
=لا انا لسة مش اتجوزت
-مش كنت المرة اللي فاتت ماجيتيش عشان في عريس جاي
=اه بس لسة يعني الموضوع متعلق
-ليه
=هو دكتور محترم وابن ناس واسلوبه كويس بس جه مرتين وكل اما نسأله عن اهله يقول لما نتفق ..طبعا ماما وبابا اتضايقو فقال هييجي يوم الخميس مع اهله
-طيب تمام
=لا مش تمام خالص
=•ليه بس
=لانه لما قعد معايا اشترط شرط غريب اوي
-ايه !
=قالي انه مش عايز يخلف وانا ضد كدة طبعا
-هو منين ده
=هو بيقول من اسكندرية بس لما سألنا عنه لقيناه شغال في مستشفى القصر العيني وقالو انه مقيم هنا
=•هو اسمه ايه انا جوزي شغال فيها ممكن يعرفه !
=اسمه سليم الألفي
انتفضت ياسمين من مكانها و………..
يتبع….. الجزء الثاني من هنااااااا

الجزء الثاني من #زوجي_المصون❤

=اسمه سليم الألفي

انتفضت ياسمين من مكانها وصاحت

=•بتقولي اسمه ايه

-بتقول سليم صاحب جوزك يا ياسمين (قلتها وانا اغمز لها بعيني ففهمت )

=بجد صاحب جوز حضرتك

=•اه .. وانتي رأيك فيه ايه بتحبو بعض وكدة (قالتها بعصبية ورجفة صوتها تكاد تخنقها)

=لا لا انا مش مرتاحة ليه أبدا وخصوصا موضوع عدم الخلفة ده معناه انه إنسان غير مسؤول

=•هو جاي تاني عندكو امتى؟

=يوم الخميس

=•تمام …تمام

-طيب اشربو الشاي قبل مايبرد

باتت اعين ياسمين تلتمع بشدة وهي تحبس دموعها وتحتسي الشاي وكأنها مغيبة صدمة هي وأي صدمة ان تكتشف ان الرجل الذي عاشت معه لسنوات وحرمها لذة الأطفال يريد الزواج او ربما هو متزوج بأخريات فقد بات شخصا غريبا لا تفقه تصرفاته أبدا ..

=انا لازم امشي عشان ماتأخرش

-اتفضلي ياحبيبتي

اوصلت اسماء الى الباب ثم عدت لياسمين التي لم تتمالك هذه المرة ان تحبس دموعها

-بصي قبل مانقول اي حاجة اهدي خااالص عشان نعرف نفكر

=نفكر في ايه يا ثريا نفكر في ايه

كان صوتها مرتفعا بشدة لدرجة ان اسراء وخديجة انتبهتا وجاءتا مسرعتين وهما يسألاني ماذا حصل فطلبت منهم ان يدخلو الى غـ،ـرفتهم ويصطحبوا معهم سعد الذي بدا حزينا هادئا لطوال اليوم بسبب معلمته التي تنمرت به امام زملائه …

-اهدي بقى عشان العيال مايسمعوش حاجة

=انا همـ،ـوت ياثريا انتي متخيلة احساسي وانا جوزي رايح يتجوز معيشني ست سنين من غير خلفة وعايش حياته ودافني بالحيا ومستحملاه عشان قال ايه بحبه وبيحبني وهو واطي بيلعب بديله

-يابنت الحلال اهدي بس عشان نعرف نفكر

=نفكر في ايه لسة انا هطلق منه فورا

-بسهولة كدا

=اومال اعمل ايه

-ربيه

=هو ده وقت هزار

-لا مبهزرش أبدا ربيه بجد اومال هو يلعب بيكي وانتي تسيبيه بسهولة

=طيب ازاي (قالتها وهي تمسح دموعها )

-بصي احنا اصلا منعرفش التفاصيل احنا نستنى نشوف هو رايح امتى واقولك هنعمل ايه اما فكرة تطلقي دي غلط انتي ممكن تستغلي الموضوع

=ازاي!

-هو اكيد وقتها هيحاول يستسمحك وانتي هتصممي ع الطلاق ساعتها تجبريه في موضوع الخلفة

=بس مش هقدر أنسى انه بيخون لا لا انا مش طايقاه

-لا غلط يا ياسمين اَي حد بيضعف وحاولي تسامحي معقول تسيبي حب حياتك كدة بسهولة

=(تنهدت وهي تضع احدى يديها على الأخرى ) هحاول

-قومي بقى اغسلي وشك عشان ننزل مع الناس ونعمل الواجب

=طيب ..

نزلت انا وياسمين بعد ان أوصيت اسراء بالاهتمام بأخواتها فدائما ماادعم ثقتها بنفسها وأنها الكبرى التي يمكنني الاعتماد عليها في غيابي لذا هي تقوم بذلك بكل حب دون تذمر .. جلسنا لبعض الوقت حيث اتجهت ياسمين لتهدئة البنت الصغرى للأستاذ احمد فيما ذهبت انا للدكتورة سامية …

-البقاء لله يادكتورة

=عظم الله أجرك الحمد لله

-كلنا لها ربنا يصبرك

=كان نفسي يومي قبل يومه ده هو سندي وضهري وواخد بحسي سايبني في الدنيا لوحدي ليه

-وحدي الله يادكتورة ربنا يخلي البنات وسيادة الظابط

=مايعوضوش حد أبدا كله في حياته ماحدش هيسأل (وبدأت في البكاء بشدة )

-انا اسفة والله مش قصدي اوجعك ربنا يصبرك يارب ربنا يصبرك

=لا يابنتي انتي ماقولتيش الا اللي موجود

في حين كانت الصغرى تنتحب على والدها الفقيد كانتا الكبرى والوسطى يتهامسن جانبا وكأنهما في جلسة سمر ! ياللقسوة الممتزجة بعدم الحياء ألم ترق قلوبهن لأمهم التي لم تذق طعم الاكل منذ الفجر ألم يشتقن لأبيهن الذي لم يحرم أيا منهن لذة اشتهينها ؟… وجدت اسراء قد نزلت الي مسرعة ..

=ماما ..ماما

-ايوى يااسراء فيه حاجة ولا ايه !

=بابا قاعد يتصل وبيزعق

-بيزعق!؟ طيب تعالي يلا نطلع نشوف فيه ايه

استأذنت منهم وصعدت على الفور فيما بقيت ياسمين معهم ..كان زوجي لا زال يتصل مرة بعد مرة ..

-الو ايوى يااحمد فيه ايه

=فيه انك قليلة الذوق و…

-ايه ده فيه ايه انت ايه اللي بتقوله ده

=يعني ينفع اختي تكلمك تفتحي الخط وماترديش ولما تقولك تعالي اخر الاسبوع عشان ماما عايزة تشوف العيال تقومي قافلة في وشها

-لا لا والله ماحصل انا ماكلمتش رانيا والله انا من ساعتها تحت في العزا ولسة طالعة لما اسراء قالتلي انك بتتصل

=يا سلام .. اتصلي حالا واعتذري

-اعتذر على ايه الكلام ده ماحصلش وانت المفروض تعتذر عن شتيمتك ليا رانيا ماتصلتش اصلا

=•لا طنط رانيا اتصلت يا ماما

-اتصلت! اتصلت امتى يااسراء

=يلا علمي البت الكذب يلا …سلام ياست هانم

-الو ..الو .. هي اتصلت امتى يااسراء

=•وانتي تحت بس كان سعد بيلعب على تليفونك

-وماقولتيش الكلام ده لابوكي ليه ( بدا صوتي مرتفعا حتى لاحظت رجفة اسراء خوفا هدأت قليلا) عشان هو كدة زعل مننا هو وعمتو وافتكر اننا قفلنا في وشها

=•انا اسفة يا ماما والله طيب هاتي اكلمه اقوله

-لا خلاص ياحبيبتي مافيش حاجة يلا عشان نحضر العشاء

قمت حينها بالاتصال على رانيا لمرتين متتاليتين لكنها لم ترد ! اصطحبت اسراء معي الى المطبخ كاعتذارا مني لها على اخافتها حين بدا صوتي مرتفعا حتى حضرنا العشاء ونادت اخواتها وتناولنا عشائنا ثم قامت اسراء لحل واجباتها وتحضير جدولها المدرسي ريثما ارفع الطعام المتبقي واغسل الاواني ثم بدأت اذاكر لخديجة بعض الارقام والحروف وقمت بعدها بتحميم سعد حتى يخلد للنـ،ـوم ..ما ان نامو جميعا قمت بالاتصال مرة اخرى برانيا فردت هذه المرة…

-السلام عليكم

=….

-الو …رانيا سامعاني

=اه بس بعمل زيك ومابردش

-على فكرة في عزا في العمارة وكنت تحت لما الولاد فتحو عليكي وقفلو

=اممم طيب عموما ماما عايزة تشوف العيال ابقي هاتيهم يوم الجمعة

-ان شاء الله يا رانيا .. مش عاوزة حاجة احيبهالك من القاهرة وانا جاية

=لا .. مع السلامة

-الله يسلمك …

دائما ماتسبب لي رانيا المشاكل مع زوجي وتؤذيني بحديثها اللاذع لكن لابد ان اتحملها لاجل زوجي ..رغم اني مستاءة منه جدا بسبب اسلوبه وطريقته التي حادثني بها الا انني احاول دائما ان اتخطى ذلك بسبب غربته بعيدا عنا وكثرة متاعبه بها وحيدا فلن اكون انا ايضا سببا لمتاعب لا داعي لها …

في صباح اليوم التالى قمت بتوصيل اسراء وخديجة ثم ذهبت مع سعد الى الروضة لكي اتحدث مع تلك المعلمة ..

-ازيك يا ميس آية

=اهلا وسهلا

-انا ام سعد

=اهلا بحضرتك

-بصراحة انا جاية النهاردة مخصوص لحضرتك

=ليه بس ( قالتها وهي تأكل علكتها بدون مبالاة وتنظر في الاتجاه المجاور)

-يعني ذنبه ايه ابني تقوليله مش هديك شيكولاته عشان انت تخين وتتريقي عليه وسط زمايله

=بهزر معاه عادي يعني

-بس انا ابني مريض غدة وتخنه ده غصب عنه يعني…

=طيب طيب انا دلوقتي عندي شغل

تركتني وذهبت بكل عجرفة وكأن شيئا لم يكن اصابتني عصبية عارمة واتجهت فورا الى مديرة الروضة وسردت اليها كل ماقد حصل اعتذرت لي بشدة واستدعت المعلمة على الفور وطلبت منها الاعتذار لي في البداية تذمرت آيه ولم تستجب وهي تبرر انه ماكان الا مزاحا …

-بس نفسية الاطفال ماتتحملش كدة يا ميس

=فعلا يامدام ثريا … آيه انتي غلطانة الاطفال هنا عشان يتعلمو الادب وازاي يحبو بعض ويراعو مشاعر بعض ماينفعش احنا نتريق عليهم ونبقى بنعمل عكس اللي بنعلمه ليهم .

=•حاضر يااستاذة ابتسام

=اعتذري و…

-لا يااستاذة ابتسام انا مش عايزة اعتذار ولا حاجة بس ياريت الموقف مايتكررش وبس كدة

=اكيد يامدام ثريا حقك علينا كلنا

كانت ياسمين تتصل حينها …

-طيب استأذن انا سلام عليكم …

عاودت الاتصال بياسمين ..

-الو يا ياسمين

=ايه يابنتي فينك قاعدة اخبط مش بتفتحي

-انا بره جاية اهو

=طيب هاتي معاكي كرواسون بقى زمانه لسة طازة دلوقتي في المخبز

-هههه حاضر على طول دماغك في الاكل

=ياستي اهو بطلع غلي فيه بدل ماامـ،ـوت الراجل

-طيب جيالك اهو اعملي شاي على مااجي

=قشطة يلا ..

اشتريت بعض المخبوزات وعدت الى شـ،ـقة ياسمين كان من الغريب جدا حين مررت امام شـ،ـقة الاستاذ احمد رحمه الله كان الهدوء تاما جدا كأنما لا يوجد احد بالداخل .. ربما الجميع يغطون في نـ،ـوم عميق بعد ليـ،ـلة البارحة ..دخلت الى ياسمين وتناولنا الافطار سوية ..

=ثريا انا مانمتش من امبارح على فكرة

-ليه

=نعم ياختي ..جوزي رايح يقابل عروسته بكرة شفتي السكر اللي انا فيه

-هههههه يخرب عقلك يا ياسمين ضحكتيني والله طيب يابت هو متغير معاكي ولا

=بالعكس كويس جدا بس انا مش طايقاه ده انا بالليل وهو نايم كان هاين عليا اخبطه اجيب اجله

-هههههه ياساتر عليكي

=انتي لو حاسة احساسي مش هتقولي كدة ..المهم ماقولتليش بردو هنعمل ايه!؟

-بصي ياستي .. انا لما اطلع هكلم اسماء اخد عنوانها واعرف جوزك رايح امتى وتكوني انتي هناك بس ماتعمليش اي حاجة عشان الحق يبقى معاكي

=ازاي يعني

-يعني هتكوني هناك قبله مع اسماء جوه ولما هو يروح ويدخل تدخلي عليه وتبصيله كدا وتسيبيه وتمشي طبعا هو هييجي يجري وراكي وساعتها هتروحي على مامتك وتتقلي بقى وتذلي فيه شوية وبعدين تملي شروطك عشان ترجعيله

=ايه الفيلم الهندي ده ياثريا ده انا لو رحت ولقيته هناك هلم عليه الدنيا

-يابت اعقلي وماتضيعيش حقك

=طيب طيب ربنا يستر

بعد انا أمضيت وقتا لطيفا مع ياسمين عدت لشـ،ـقتي لتجهيز الغداء والى الآن لم يتصل بي احمد !! كنت اطمئن عليه من خلال اخر ظهور له على مواقع التواصل الاجتماعي دون ان احادثه .. حين عادوا دخلت اسراء وهي تترنح مبتهجة …

=طلعت الاولى في امتحانات الشهر ياماما

-برافو عليكي .. سعد ياحبيبي عامل ايه النهاردة ( لاحظت ان خديجة تضايقت والتمعت عيناها تكاد تبكي ) ودوجا حبيبة ماما احلى بنوتة عملت ايه النهاردة

بدأوا بسرد يومهم وهم يتسابقن بينهم من ادى أفضل اداء وانا احاول ان اصغي الى كل منهم حتى لا يتحسس الآخر من شيء فدائما خديجة تشعر اني أفضل أخواتها عنها لكن ليس هكذا أبدا إنما لان اسراء دائما تساعدني وهي الكبرى ولدينا احاديث كثيرة وسعد احاول دائما تعويضه بسبب مرضه ونفسيته المستاءة بسبب عدم اللعب مثل قرناء سنه واهتم أيضا بخديجة لكن هي حساسة للغاية … ساعدوني في وضـ،ـع السفرة وتناولنا غداءنا ومن ثم رفعت الطعام وبدأت بغسيل الأواني حين عدت كانت اسراء تتحدث في هاتفي ..

-اسراء بتكلمي مين !

= ده بابا .

-طيب انا هعمل عصير

=هو عايزك اصلا يا ماما

شعرت بسعادة بداخلي وتناولت منها الهاتف ..

-الو ..

=ازيك ياثريا

-الحمد لله

=لسة زعلانة مني

-ليه انت عملت حاجة

=اسراء حكتلي من شوية انا اسف بجد ضغط الشغل وكدة ماانتي عارفة وبتتحمليني

-ماشي يااحمد

=اخباركم ايه

-بخير الحمد لله

أكملنا حديثنا عن ابنائنا وماذا يفعل وحديثنا المعتاد وقد صفت اليه نفسي كالعادة فلا أطيق ان يبقى بيننا عكرة من حزن او ماشابه بعد ان اغلقت معه اتصلت بأسماء لأستعلم منها عن عنوانها في الاول بدت على غرابة من سؤالي ثم أخبرتها نيتي بإهدائها باقة بسيطة لتلك المناسبة …لا يمكنني أخبارها بما نخطط له وإلا لغت كل شيء وما تمكنت ياسمين من الامساك بزوجها متلبسا???? … اشعر ان في الأمر بعض الانانية تجاه اسماء في ان نضعها في موقف كهذا استغلالا لها ..لكن هي فتاة طيبة وجميلة ويجب ان يتعاقب سليم على لعبته على زوجته وعلى اسماء وحتما أهل اسماء سيلقنوه درسا على فعلته تلك … هذا ماتريده ياسمين … أرسلت العنوان الى ياسمين وطلبت منها أخذ باقة من الزهور حجة لذهابها .. أكملت اليوم مع ابنائي وفي المساء اتفقت مع ياسمين انا نذهب الى الدكتورة سامية لنطمئن عليها .. كانت المسكينة في غاية الاعياء وليس عندها اَي من ابنائها أخذ ابنها العزاء ليوم واحد ورحل بسبب عمله وذهبت كل من بناتها الى بيـ،ـتها وبقيت هي وحيدة ! ماهذا الجحود على الأقل كان بناتها بقين معها لثلاث أيام العزاء … تحدثنا معها لبعض الوقت وحاولنا دعوتها على العشاء مع احدانا لكنها ابت احضرت لها بعضا من الطعام وحاولت ان اضغط عليها لتأكل لكنها ابت أيضا تركت الطعام بجانبها ومن ثم صعدت كلا منا الى شـ،ـقتها وبقلبنا تنهدات من الألم المخلوط بالحسرة على حالها الذي تبدل بين لـ،ـيلة وضحاها … في الصباح ذهبن أطفالي الى دراستهم ونزلت انا وياسمين وقد قمنا بتحضير الإفطار وتناولناه مع الدكتورة سامية لنجعلها تندمج معنا ومر اليوم عاديا حين جاء ابنائي وبدأن بتحضير ملابسهن والعابهن لاصطحابها معهم حين نذهب الى جدتهم المقيمة بمحافظة اخري فسوف نبيت ليومين .. واستعدت ياسمين لتنفيذ خطتنا (الله يستر) … ذهبت ياسمين وراسلتني وهي متواجدة هناك وقد تحججت بالبقاء مع اسماء لمساعدتها اخبرتني لتوها ان اسماء أخبرتها ان العريس قد وصل في الصالون .. دق بابي فوضعت هاتفي جانبا وذهبت لأجد ان الطارق هو دكتور سليم ????

يتبع الجزء الثالث من هنااااااا

الجزء الثالث من #زوجي_المصون ❤️

ان الطارق هو دكتور سليم ????

=السلام عليكم يامدام ثريا

-الحمد لله يادكتور

=هي ياسمين فين اصلي جيت مالقيتهاش

-……

=هو فيه حاجة ولا ايه

-لا لا ده تلاقيها بتجيب حاجة وجاية

=ماانا برن عليها مش بترد

-زمانها جاية خير بإذن الله

اعتذر عن الإزعاج وذهب بانتظار ياسمين وذهبت على الفور للاتصال بها قبل ان يحدث خطأ ما لكنها لم ترد أبدا كنت قلقة جدا بشأنها اتصلت بأسماء لم ترد هي الأخرى زادني الأمر قلقا ماذا يكون قد حصل بعد ساعة أتت إلي ياسمين ..

=يالهوي ياثريا على الآي حصل

-احكيلي ده انا هتجنن

=ساعة ماسليم شافني قدامه كان هيغمى عليه

-ثواني كدة ..سليم مين اللي شافك

=سليم جوزي يابنتي

-شافك فين !؟

=عند اسماء يابنتي فيه ايه ماتركزي

شعرت ان ماء دافئا قد بلل ثيابي ???? ان كانت قد رأت سليم فمن ذا الذي رأيته انا …

-وبعدين حصل ايه

=اول ماشافني قام وقف وقالي اهدي وهفهمك قولتله افهم ايه كل اللي بينا خلص وقتها طبعا الناس اتدخلو وفهمو انه متجوز ولما صوتي انا وهو علي قالولنا انهم مش عاوزين شوشرة في بيـ،ـتهم و…

-يالهوي ده كدة اسماء ….استني هقوم أكلمها

قمت بالاتصال بأسماء التي نهرتني بشدة واغلقت الهاتف بوجهي…. على رغم استيائي لذلك الى ان الخوف كان متلبس بي بشدة ..هل احكي لياسمين ام ستقول اني بمجنونة …

=ماتضايقيش نفسك هشوفلك مدرسة غيرها للعيال ..المهم ياستي سبته ومشيت وهو جه ورأيا ولما لقاني راحة لماما قالي لا اقعدي في شـ،ـقتك وانا اللي هبات بره بيـ،ـتنا وانتي خليكي في البيـ،ـت وكل حاجة هتتحل وماتكبريش الموضوع وغلطة وغصب عني وكلام من ده

-اممم تمام

=ايه يابنتي هو ايه اللي تمام … اعمل ايه بعد كدة

-مش عارفة والله انا دماغي مش فيا خالص

=ليه بس فيه ايه

-لا مافيش انا هقوم احضر العشاء

=لا لا انا نازلة بقى همـ،ـوت ع النـ،ـوم بصراحة

-طيب خلي بالك من نفسك انا بكرة رايحة الشرقية لبيـ،ـت جوزي وهنيجي يوم الأحد ان شاء الله

=يووووه هتقطعي بيا والله بس ربنا يعينك بقى

-خير ياستي

بعدها عادت ياسمين الى شـ،ـقتها فينا أعددت انا كل لوازمنا ونمنا مبكرا فغدا يوم سفر متعب … استيقظوا في الصباح نشطين جدا وذهبنا لنركب الحافلة التي ستنقلنا الى مبتغانا وما ان وصلنا رحبت والدة زوجي بالأطفال كثيرا فهم أحفادها فلم يرزقها الله سوى بزوجي وأخته رانيا التي تمردت وأبت الزواج وكالعادة لم ترد اَي منهما علي السلام فهي موقنة اني قد اختطفت ابنها منها لأني جعلته يسكن بالقاهرة حيث بالقرب من منزل اهلي ولا يعلمون اني رغم قربي الشديد لا ازورهم بصفة مستمرة بسبب انشغالي بحياتي وحياة أطفالي وحتى اتصالاتي غير متتالية حين اعود للقاهرة يجب ان ازورهم … حاولت ان اندمج معهم رغم عدم محبتهم لي …

-وحشاني ياطنط والله

=اهلا وسهلا

-عاملة ايه يارانيا

=•عاملة ايه في ايه !؟

-في حياتك يعني

=•قصدك ايه !

-ياحبيبتي بقولك عاملة ايه عادي ازيك يعني

=•ماما انا هقوم اعمل لمون هعملك معايا

=ياريت عشان ضغطي عالي

فهمت من حديثهم اني انا المقصودة بالذم وأنهم لا يطيقون مجالستي ولولا أطفالي لطردوني خارجا .. حاولت الملاطفة مرة أخرى

-أساعدك في حاجة يارانيا

=•لا

دخلت رانيا الى المطبخ وكان ابنائي يلعبون في الجوار مع أطفال سنهم من الجيران الذين اعتادوا على زيارتهم في كل مرة نزور جدتهم ..

-ماما بتسلم عليكي ياطنط

=الله يسلمها

-وحشني جدا المحشي والبط بتاعك والله

=……

-والعيال كمان

=عملته عشانهم …كان نفسي احمد يبقى هنا

-ان شاء الله متعوضة احنا كمان والله مش بنلحق نقعد معاه

=•ماما سميرة بنت عمتي ناهد كلمتني وبتقول جاية

(سميرة كانت خطيبة احمد لكنه لم يستطع ان يحبها فتركها بسبب تغيرات كبيرة في التفكير بينهما ومن ثم التقى بي حين كنت اعمل سكرتيرة في الشركة التي كان يعمل بها في القاهرة قبل ان تأتي له فرصة عمل بالخارج … سميرة تكرهني جدا رغم انها تزوجت لكن لازالت تكرهني وتحاول مضايقتي )

=طيب كويس أهي تفتح نفسنا على الأكل

=•هو انتي هتفضلي قاعدة وانا اخدم عليكي !!؟

-بتكلميني!

=•اومال بكلم مين هو عشان قولتلك مش عاوزة مساعدة هتعملي علينا هانم

-..(بعد ان حاولت تمالك أعصابي حتى يمر اليوم على خير وقررت ان ارحل في الغد والا اطيل هنا فلن أتحمل ) طيب هعمل السلطة على ماسميرة تيجي ..

قمت وبدأت في إعداد سلطة الخضار حينها اتصل احمد …

=ها ايه الأخبار

-الحمد لله بخير

=والجماعة عاملين ايه

-كويسين بيسلمو عليك

=طيب هروح السكن واكلمكم

-تمام …

بعدها عدت الى الصالة وكانت سميرة قد وصلت منذ قليل …

-احمد بيسلم عليكم

=هو كلمك امتى

-لسة دلوقتي ياطنط وقالي انه …

=وهو مالوش أهل يكلمهم يسلم عليهم

=•الله يسامح اللي كان السبب يا ماما

=*احمد اتغير اوي ده كان روحه في أهله

-… احمد في مشوار بره سكنه ياطنط قال هيروح عشان يكلمنا لانه في الشارع

=يلا يا رانيا قومي حضري الأكل زمان العيال جاعو

=*العيال دول وحشين لمين كدة ده احمد قمر

كنت في شدة غضبي لكن أيضا احاول تمالك أعصابي قمت وحضرت السفرة مع رانيا وانتهينا من الغداء وتناولنا الشاي ولم يخلو حديثهم من ايذائي بشكل مستمر وانا تارة لا ارد وتارة أغير مسار الموضوع واستمر كامل اليوم بهذا الشكل ولم تخلو ذاكرتي مما حدث البارحة وذاك الشخص الذي رأيته وقد تحدث معي عن ياسمين وقد كان سليم متماثلا امامي لا أنسى الموقف أبدا هل كان شبحا ام تهيؤات ام ماذا لا ادري لم تغمض لي عين منذ البارحة … في صباح اليوم التالي عدت انا وأطفالي الى القاهرة متحججة بدوامهم المدرسي في اليوم التالي رغم انه من السهل ان يتغيبوا لكن لم اعد أتحمل البقاء لأكثر من ذلك .. وصلنا وقد بدأت في فتح النوافذ وتشغيل قرآن في المنزل ومسحه بماء وملح اعتقادا مني اني قد رأيت شبحا … بقيت لطوال يومي تجتاحني الوساوس كلما نظرت الى باب الشـ،ـقة .. اتصلت الى امي وتحدثت معها لبعض الوقت واخبرتها اني سأزورها في اليوم المقبل … بعد قليل جاءتني ياسمين …

=ايه يا لوزة مش تقولي انك هنا

-والله جيت مستعجلة وقلت اروق الدنيا الأول ..أنتي ايه الأخبار

=ولا اَي جديد بيحاول يصالحني وانا لسة

-طيب وبعدين

=هو مصمم يقابلني وانا مش راضية

-لا كدة اوفر انتي قاعدة تشدي عليه ارخي شوية

=جت في دماغي فكرة اني أقابله بكرة في الكافيه في الشارع اللي ورانا

-طيب كويس

=بس عايزاكي تبقي موجودة عشان لو انا شديت تحاولي تلطفي الدنيا وترخيها

-لا لا ماينفعش ده بينك وبينه

=ياثريا اعتبريني أختك واقفي معايا

-ماينفعش والله احمد يضايق جدا

=مش لازم يعرف

-نعم !!! انا عمري ماخبيت عنه حاجة

=ثريا وحياة اهلك تقفي معايا

-خلاص بطلي زن ماشي

أكملنا جلستنا ثم عادت ياسمين لشـ،ـقتها وساعدت أولادي في إعداد حقائب المدرسة والروضة ثم رحنا في نـ،ـوم عميق بعض يومي المتعب … في اليوم التالي وبعد ذهابهم الى المدرسة رتبت كل شيء واعددت بعض الكيك والمخبوزات التي تحبها امي من صنع يدي وقد بخرت المنزل وقرأت سورة البقرة بصوت مسموع .. في العصر تجهزنا انا وأطفالي للذهاب لأمي..

-ماما وحشتيني جدا

=وانتي كمان والله يا ثريا ماتطوليش الغيبة كدة

-والله غصب عني ياحبيبتي انا عارفة اني مقصرة سامحيني

=المهم تكوني بخير انتي وحبايبي دول

-الحمد لله ياماما

اندمجت مع امي في الحديث عن كل تفاصيلي دون ذكر ماقد حدث حول رؤيتي لسليم حتى لا تخاف علي .. أرسلت لي ياسمين رسالة تستعجلني تركت ابنائي مع والدتي واخبرتها ان ياسمين تنتظرني بالكافية المجاور ولن اتأخر وذهبت وليس بداخلي من الارتياح ذرة … يخبرني شيئا ما ان هناك خطأ لكن لا اعلمه (الله يستر) ..حين وصلت كانت ياسمين لم تأتي بعد وحين رآني سليم نهض مسرعا باتجاهي ..

=اتفضلي يا مدام ثريا ايه الصدفة دي

-شكرا ربنا يخليك

بدأت في الالتفات حولي وكأني ارتكب جرما عظيما وحين التفت عن يميني … يتبع

الجزء الرابع و الأخير من هنااااااا

#ريم_السيد

الجزء الرابع والاخير من #زوجي_المصون ❤️

وحين التفت عن يميني …رأيت ياسمين تجلس في طاولة بعيدة اعتقدت ان سليم لم يرها ..

-ايه ده مش دي ….

=طيب بعد إذنك بس هرد على المكالمة

أخذ سليم هاتفه ليتحدث وابتعد قليلا تقريبا حالة طارئة ثم استأذن وذهب مسرعا ولم يعطني فرصة ان اخبره بوجود ياسمين ..ذهبت انا لياسمين ..

-ايه يابنتي ماقعدتيش معاه ليه

=ماقعدتش مع مين !؟

-مع سليم .. ماانتي شايفاني واقفة معاه ماجيتيش ليه ما دام انتي هنا ..

=واقفة مع مين !؟ سليم مين ده إذا كان سليم لسة متصل بيعتذر انه مش جاي اصلا

-ازاي بس انتي هتهزري

=بطلي اشتغالات ياثريا واقعدي نشرب حاجة …

-لا لا انا لازم امشي سلام

ذهبت وانا يكاد يغشى علي من الصدمة وتأكدت بأني ارى شبح سليم ورجفة تسري ببدني لم استطع تمالك أعصابي وبدأت اتصبب عرقا من الخوف .. ذهبت لأمي ولم أتكلم او ارد على اَي كلام يقال فساورها القلق تجاهي ..

=ثريا …انتي كويسة

-ايوى

=لا مش باين أبدا

-يا ماما كويسة والله انا هقوم بقى عشان ….

=هي ياسمين زعلتك في حاجة

-ياماما صدقيني مافيش حاجة انا هروح انا والعيال بقى عشان يلحقو يحلو الواجب وينامو بدري

=ماشي ياحبيبتي خلي بالك من نفسك وارمي حمولك على ربنا

عدت الى شـ،ـقتي انا واولادي وبعد ان انتهوا من واجباتهم وحضروا حقائبهم وتحدثنا جميعا الى زوجي عبر مكالمة فيديو وخلدوا الى نـ،ـومهم لم استطع النـ،ـوم أبدا حينها من ذا الذي رأيته لمرتين في مكانين مختلفين إذا المشكلة ليست في الشـ،ـقة المشكلة بي انا شخصيا حاولت ابعاد الأفكار السلبية عني وبدأت اتصفح الفيسبوك كان زوجي قد كتب منشورا آلمني كثيرا…

اليُتم ليس يُتم الأب فقط هناك يتيم للحب ويتيم للصداقة ويتيم للاخوة ويتيم الوطن واااه من يُتم الوطن.

فهو يعيش منفي بعيدا عن كل ماتتوق له الروح تمر الأعياد وهو وحيد يملأ العجز وجه والديه وهو بعيد يسرق العمر منه الشباب والصحة وهو غريب عن الأهل والأحبة يفرح لوهلة ويبكي وحيدا لأيام .

ف رفقا بيتيم الوطن ????

على الفور اتصلت به لأواسيه بعض الشيء في غربته التي توجعني قبل ان توجعه… عاود هو الاتصال بي ..

-ازيك يا حبيبي

=الحمد لله

-انت كويس

=اهو ياثريا ماشي الحال

-هونها تهون ان شاء الله

=انا تعبت من الغربة لوحدي ونفسي تيجو هنا

-وانا كمان بس دراسة العيال هنا وياسمين كمان هسيبها لوحدها والعيشة عندك غالية كدة مش هنوفر حاجة

=خير بقى …انتي سهرانة ليه

-مش جايلي نـ،ـوم خالص والله

=ليه بس

-عادي ..قوم انت نام عشان مش تتأخر وكلها كام شهر وتيجي

=ربنا يسهل …تصبحي على خير

أكملت الليل وحيدة اتلفت حولي والخوف متمكن مني حتى شعرت اني سأصاب بالجنون .. في اليوم التالي وبعد ذهابهم الى المدرسة والروضة أتت ياسمين لتشاركني الإفطار كنت أبدو غريبة وهادئة ولا اشاركها الحديث ..

=ايه يابنتي اللي واخد عقلك

-ها…

=ها ايه انتي سرحانة ليه !؟

-مافيش والله تمام

=لا شكلك مش تمام خااالص

-سيبك مني ..انتي عملتي ايه مع سليم

=ولا حاجة

-يعني هو ماجاش

=لا

-انتي هتجننيني كدة .. انا شايفاه بيركب عربيته وانا بوصل العيال

=نعم ياختي .. سليم النهاردة بيبقى النبطشية اصلا

-….

=مالك يابنتي

-لا لا انا هيجرالي حاجة انا كدة اكيد ملبـ،ـوسة

=ياساتر يارب ايه السيرة دي

-انا هتجنن والله

=لا اهدي كدة … انا هقوم انزل بقى عشان ماعطلكيش

ذهبت ياسمين وبقيت وحدي اتصبب عرقا من الخوف وابكي وانا لا ادري لما يحدث ذلك معي حين اتى اطفالي لم اتحمل ازعاجهم حين لعبهم وعلى عكس عادتي ابرحتهم ضـ،ـربا ولم اتعاطف مع ايا منهم

اصبحت عصبية جدا شاردة معظم الوقت اهمل في بيـ،ـتي وزوجي وحتى اولادي وصامتة لاغلب الوقت حين علمت امي اخذتني اليها لتهتم بأولادي وترعاني ريثما اعود لطبيعتي وهي لا تعلم ماذا اصابني … قد اصـ،ـابني الخوف والرعـ،ـب من كل شخص وبين يوم وآخر ترقيني امي رقية شرعية لعل مابي يذهب لكن حالتي تزداد من سوء لأسوأ اصر زوجي ان يأتي لانه لم يتحمل ماقد صار لي … حين عاد زوجي من سفرته القصيرة طلب من امي ان تعود لبيـ،ـتنا ليمرضني هو بنفسه ويعتني بي فمهما كان امي كبيرة في السن والعناية بي وبأطفالي امر صعب .. عدت لمنزلي وسردت الى زوجي كل ماقد حدث …

=بصراحة غريب اوي

-….

=بس انا حاسس ان فيه حاجة غلط

-مش فاهمة

=مش عارف بس مش عايز اظلم حد بس في نفس الوقت مش قادر اشوفك كدة

-يعني ايه

قام زوجي وفتح النافذة ونظر منها فوجد سليم ينزل من سيارتها يحمل بعض الاكياس في يديه فمعنى ذلك انه بالتأكيد سيصعد الى شـ،ـقته ..

=ثريا قومي البسي عبايتك

-ليه

=اسمعي الكلام بس

-حاضر

ارتديت عبايتي وطلب مني سليم ان ادق باب ياسمين واسألها عن سليم وسيراقبني هو من بعيد

-ازيك يا ياسمين

=تمام ..هو انتي رجعتي امتى

-النهاردة ..هو صحيح يا ياسمين انتي ليه مش زورتيني ولا كلمتيني

=لا كلمتك يابنتي وجيتلك كذا مرة

-بجد ..انا مش فاكرة ! طيب هو سليم موجود

=لا لسة ولا اتكلمنا ولا اتصالحنا ولا ….

=•ولا ايه يا استاذة يامحترمة

=ايه ده استاذ احمد … هو حضرتك بتزعق وتكلمني كدة ليه

=•عشان انتي كدابة (كان يتكلم احمد بعصبية وصوت مرتفع وانا لا افهم شيء )

-فيه ايه يااحمد اهدى

=•اهدى ايه … سليييم سلييييم

=ايه اللي بتعمله ده عيب كدة

-اهدى يااحمد

=*فيه ايه ايه الزعيق ده يا ياسمين

=ده … ده .. ( نظرت الي ياسمين وهي تود ان تبكي )

-ايه ده .. سليم .. هو مش انتي قولتي انه … ايه ده هو فيه ايه انا مش فاهمة .. انت شايفه يااحمد صح

=*هو فيه ايه ياجماعة انا مش فاهم حاجة

=•يعني عايز تفهمني انك مش مطبخها مع ميراتك

=*لا انا مش فاهم حاجة ايه الموضوع ماتكلمي يا ياسمين فيه ايه

=….

=•وفين ست اسماء كمان اللي متفقين معاها

=*اسماء مين … ماتفهموني فيه ايه .. تعالو جوه طيب الجيران بيتفرجو علينا

=•دكتور سليم يوم الخميس اللي كان من اسبوعين حضرتك طلعت سألت ثريا عن ميراتك

=*ايوى حصل لانها ماكنتش موجودة

=•تمام … الكافيه اللي شارع الخديوي شفت فيه ثريا صدفة واتكلمت معاها

=*ايوى كانت ياسمين المفروض جاية وماجتش حتى يومها كان حصل حالة طارئة ومشيت بسرعة

=•يعني حضرتك مافيش مشاكل مع ميراتك ولا بايت عند والدتك

=*مشاكل … مشاكل ايه لا خالص انا هنا يوميا انا والدتي متوفية من سنتين اصلا ومدام ثريا بتشوفني ع طول وهي بتوصل الاولاد للباص

-…..(دموعي متواصلة لا تكاد ان تقف هل مافهمته الان صحيحا …)

=….(ياسمين تنظر الي وهي تبكي دون ان تتفوه او ترد بكلمة)

=•ميراتك المحترمة كانت عاملة لعبة مع واحدة المفروض كانت بتدخل بـ،ـيتنا بشكل يومي عشان يخلو ميراتي تتجنن

=*ازاي ده ..دول اصحاب طول عمرهم اكيد في سوء تفاهم .. ماتردي يا ياسمين .. انتي ساكتة ليه

=•هتقول ايه يعني … لا وكمان ماصعبتش عليها صاحبتها بعد اللي جرالها وبتكمل الفيلم عليها وتقولها زورتك … انتي عارفة لو كنتي زورتيها فعلا يمكن ماكنتش شكيت فيكي …

-ياسمين … هو اللي بيقوله احمد ده بجد

= …..

-انا عملتلك ايه يا ياسمين ده انا اعتبرتك اختي وكل حاجة ليا

=…..

-ده انا ولادي بيعتبروكي امهم

=انا ماكنتش عايزة حد يعتبرني انا كنت عايزة عيال واعيش مبسوطة زيك والاقي راجل يحبني ويهتم بيا في وسط المشاغل (كان صوتها مرتفعا وهي تبكي بشدة )

-بتغيري مني !!! ازاي يا ياسمين ازاي

=ايوى يا ثريا ايوى بغير

-طيب واسماء ازاي قدرتي تضحكي عليها

=اسماء بنت خالتي

-بنت خالتك ! … ليه كدة ده انا كنت بمـ،ـوت من الرعـ،ـب وبدأت اتجنن.. ربنا. يسامحك ربنا يسامحك

=*انتي يا ياسمين تعملي كل ده ازاااي … انا مصدوم فيكي … ده انا كنت فاكرك ملاك … لما عملتي كدة في صاحبة عمرك اومال انا تعملي فيا ايه

=•بعد إذنك يادكتور ربنا يعينك

=*انا اسف جدا والله ماعارف اقول ايه انا بعتذر ليكي يا مدام ثريا بجد

-….

كان زوجي قد امسك بيدي وصعدنا لأعلى فلم تكن حالتي تسمح ان ابقى لأكثر من ذلك كان المـ،ـوت اهون من ذاك السكين التالم الذي ذبـ،ـحتني به صديقة عمري … هل يأتي الغدر من اقرب قريب هل يمكن للغيرة ان تجعل صاحبها يتخلص عنوة من الأقارب كيف لياسمين ان تفعل هكذا بي وما ان لم يأتي زوجي بالتأكيد كان مكاني الان في مصحة للامراض العقلية بسبب صديقتي ….

طلق سليم ياسمين فلم يستطع ان يعطيها امان من جديد لم يظلمها يوما فالحقيقة ان ياسمين لن تنجب ابدا هي عقيم كان سليم يعلم كل شيء منذ البداية لكن حبه الشديد لها جعله يتخطى كل ذلك ليتزوجها بل واقنعها ايضا انه لا يريد الانجاب خوفا على مشاعرها … حاولت ياسمين ان تصلح ماقد افسدته معي لكن بات الامر مستحيلا ثقتي بها تحطمت ولست ابدا بغبية لتستغلني من جديد … اصر زوجي ان يعد اوراقنا للسفر معه هذه المرة لنكون سوية حتى ان لم نوفر قرشا فأن نبقى معه ويجتمع شملنا هو افضل من أي شيء …????

#ريم_السيد